O albergue rural Alvarella Ecoturismo, situado en Vilarmaior (A Coruña), no Parque Natural Fragas do Eume, foi seleccionado como finalista xunto a outras doce marcas europeas como a empresa da Unión Europea que mellor deu a coñecer a etiqueta ecolóxica 'Eurolabel', un selo voluntario para produtos sostibles e destinos turísticos respectuosos co seu ámbito.
O gañador darase a coñecer nunha cerimonia na noite deste luns e o premio recoñecerá "a calidade, a creatividade e a pertinencia das actividades, así como o uso efectivo do logotipo", segundo a Comisión Europea.
Dende a súa creación en 1992, un total de 25.000 artigos e lugares da UE contan coa etiqueta que acredita o respecto polo medio.
O comisario de Medio Ambiente, Janez Potocnik, destacou que as empresas europeas teñen "un papel clave" para facer cambiar os costumes dos consumidores cara a prácticas máis sostibles. Por iso, felicitou nun comunicado ás finalistas e agradeceu "os seus esforzos en favor do medio e pola promoción que fan deste selo de excelencia".
Ademais do albergue rural español, tamén compiten ao galardón na edición deste ano outros doce candidatos: Adria Hotel Praga (República Checa), Alpheios International (Países Baixos), Arjowiggins Graphic (Francia), Bona AB (Suecia), Delhaize (Bélxica), Jardim Atlantico (Portugal - Madeira), Novoceram sas (Francia), Sara Le Corp - Sanex (Países Baixos), Solus (Irlanda), Sutter Industries SpA (Italia), UPM-Kymmene Corporation (Finlandia) e ZX FAMI Ltd (Chipre).
O 'Eurolabel' é o único selo ambiental paneuropeo e pretende fomentar a produción e o consumo de produtos e servizos ecolóxicos en toda a UE. Identifícao un logotipo en forma de flor e lévano produtos de limpeza, aparatos electrónicos, artigos de papelaría, téxtil, produtos de xardinaría e do fogar e lubricantes, ademais de aloxamentos turísticos.
BRUXELAS, 18 Oct. (EUROPA PRESS) -
Sem comentários:
Enviar um comentário